balachandar muruganantham

இன்று தான் சட்டக்கல்லூரியில் நடந்த கொடூர செயலை விழி வழியாக பார்த்தேன். மாணவர்களுக்குள் நடந்த இந்த மோதலை தடுக்கக் கூட முடியாத கல்லூரி முதல்வர், கொடூர செயலை கண்டும் ஒன்றும் செய்யாமல் விட்ட காவல் துறையினர். இவர்களிடமா நீதி கிடைக்கப்போகிறது? இவர்களிடமா நியாயம் கிடைக்கப்போகிறது? அய்யகோ! நாடு எங்கே போகிறது? இவர்கள் தான் நாளைய இந்தியாவின் தூண்களா? தலைவர்களா இல்லை தலைவலிகளா!

ஒரு சட்டக்கல்லூரி வளாகத்தில் நடந்த சட்டஒழுங்கை காக்க முடியாத சட்டம் தேவையா? ஒரு மாணவனை வெறித்தனமாக் அடிப்பதை பார்த்த காவல் துறையே! நீங்கள் மனிதர்களா? உங்களுக்கு மனசாட்சி இல்லையா? உங்களுடைய மனிதாபிமானம் எங்கு போனது? எங்கே பார்த்தாலும் சட்ட ஒழுங்கு பற்றி பேசும் நீங்கள், அது உங்கள் கண் முன் கெடும் போது என்ன செய்தீர்கள்? தமிழர்களா நீங்கள்? மனிதர்களா நீங்கள்? இலங்கையில் வாழும் தமிழர்களுக்காக போராடும் தமிழர்களே! தமிழ் நாட்டில் வாழும் தமிழர்களுக்காகவும் போராடுங்களேன். கெட்ட தமிழர்களிடமிருந்து நல்ல தமிழர்களை காக்க உதவுங்கள்.

காவல்த்துறைக்கு ஒரு வேண்டுகோள். கலவரத்தில் ஈடுபடுட்ட மாணவர்களை இழத்து போட்டு பெண்டு நிமித்துங்கள். எவன் தவறு செய்திருந்தாலும் அவனை சிறையில் போடுங்கள்.
தமிழக அரசுக்கு ஒரு வேண்டுகோள். காயமடைந்த மாணவனுக்கு உரிய (நிவாரணம் இல்லை) நீதி கிடைக்க வேண்டும். இனிமேல் சட்டக்கல்லூரியில் எந்த வித கலவரமும் நடக்காமல் பார்த்துக்கொள்ள வேண்டும். இதுவே கடைசி முறையாக இருத்தல் வேண்டும்.

சட்டக்கல்லூரி மாணவர்களே! உங்களுக்கு கோடானு கோடி வேண்டுகோள்!
கல்லூரி பருவத்தில் நன்கு சட்டம் பயின்று, இந்த நாட்டில் சட்டஒழுங்கினை நிலைநிறுத்த வேண்டாம். அதற்கு மாறாக, சக மாணவர்களை துன்புறுத்தாதீர்கள். அவர்களும் உங்களை போன்று மாணவர்கள் தானே. என்ன பிரச்சனை இருந்தாலும், பேசி தீர்த்துக்கொள்ளுங்கள். வன்முறை தீர்வாகாது. நீங்களே சட்டத்தை உங்களது கையில் எடுத்தால், மற்றவர்கள் எப்படி சட்டத்தை மதிப்பார்கள்? நீங்களும் மனிதர்கள் தானே? மிருகங்கள் இல்லையே? உங்களுக்கும் மனிதாபிமானம் இருக்கிறதா? நீங்கள் அடித்துப்போட்டீர்களே அவர்கள் யார்? உங்களுடைய சொந்தம். நம்முடைய சொந்தம். நாமெல்லாம் ஒரு சமுகம். தமிழ் சமுகம்.

சினம்தாழ்த்தி உங்களை ஒன்று மட்டும் கேட்டுக்கொள்கிறேன். வன்முறை வேண்டாம். இரத்த வெறி வேண்டாம். நீயும் வாழு. மற்றவர்களையும் வாழ விடு.